++ Kerls mit Masken in de Speelhall - statts Geld mit Handysöver´n Diek gahn ++ Radfohrer dull mallört - nich op´n Verkehr acht ++ Haueree in de Binnenstadt ++
(ots) - Ne´es vun de Gendarms ut
Lümborg/Lüchow-Dannenbarg/Uelzen an´n 1. April 2016
Lümborg
Bleckd - Inbreker klaut Geld
In de Tiet twüschen den 30.3., Klock negen avends, un den 31.3.,
Klock negen morrns, hebbt Spitzboven in den olen Kroog in de Brede
Straat inbraken. Se hebbt en poor hunnert Euro Bargeld mitnahmen. De
Schaden an de Saken belöppt sik so üm un bi op 1000 Euro. Wokeen wat
sehn hett, mellt sik bi de Polizei in Bleckd ünner Tel. 05852-979810.
Adendörp - Inbreken in en Wahnhuus
An´n 31.3. sünd Deev in en Wahnhuus in´n Eggenweg inbraken. De
Deder hebbt de Terassendöör opbraken un dat ganze Huus op´n Kopp
stellt. As de Mann Klock half tein na Huus keem, segg he noch Licht
in dat Huus un he künn ok noch hören, dat de Deder weglopen sünd. Bet
nu weet noch keeneen, ob dor wat klaut worrn is. De Schaden dörch den
Inbrook belöppt sik op 100 Euro. Wenn een wat sehn oder hört hett,
schall´n sik bi de Polizei in Adendörp mellen, Tel. 04131-9910690.
Lümborg - Haueree in de Binnenstadt
Bet nu weet man noch nich, worüm en 15 Johr ole Jung vun en annern
Jung, de ok 15 Johr olt is, so dull verkloppt worrn is, dat he sik
een Platzwunnen an´n Kopp totagen hett. Dat is passert vör en
Koophuus in de Hindenburgstraat. Ene Deern, 14 Johr olt, wullt den
Jungen helpen, man ok se is vun enen annern Deder un de Mudder - 44
Johr olt - peddt worrn. De verletzten jungen Lüüd sünd mit den
Rettungswagen in dat Klinikum bröcht worrn, wo man jüm holpen hett.
Tügen, de wat sehn hebbt, müchen sik bi de Polizei in Lümborg mellen
ünner Tel. 04131-83062215.
Lümborg - Füür in´n Huusflur
Man weet noch nich, wokeen an´n fröhen Morgen vun´n 1. April in
den Flur vun een Mehrfamilienhuus in de Stresemannstraat Füer leggt
hett. Dorbi sünd to´n Glück blots en Teppich un de Wahnungsdöör to
Schaden kamen. De Bewahner (50 Johr olt) is dat Füer so bi Klock
viddel vör dree wies worrn un hett dat sülms utmaakt. Em is nix
passeert. Wokeen enen Tipp geven kann, de schall anropen bi de
Polizei, Tel. 04131-83062215.
Lüchow-Dannenbarg
Dannenbarg - Radfohrer dull mallört - nich op´n Verkehr acht
Böös verwunnt worrn is en 86 Johr ole Radfohrer in de
Namiddagsstunnen an´n 31.3. bi een Verkehrsunfall in Lüggau. De ole
Kerl hett bi´t Överqueren vun de Bundesstraat 216 nich op´n Verkehr
acht un so hett em een Autofahrerin mit ehren Audi faat kregen; se
künn nich rechtiedig to´n Stahn kamen. De Senior is vun´t Rad fullen
un hett sik böös verletzt. De Schaden belöppt sik so üm un bi op 2000
Euro.
Schnega, OT Solkau - Polizei kontrulleert de Snelligkeit
In de Namiddagsstünnen an´n 31.3. hett de Polizei de Snelligkeit
vun de Autos op de Bundesstraat 71 buten de Dörper kuntrulleert.
Dorbi hebbt se 40 Fahrer faatkregen, de to snell ünnerwegens wörrn.
Uelzen
Bad Bodendiek - Kerls mit Masken in de Speelhall - statts Geld mit
Handys över´n Diek gahn
Rövers hebbt de Speelhall in de Neestädter Straat in de
Nachtstunnen to´n 1.April överfallen. As man bet nu weet, sünd twee
Kerls mit Masken ut Strümpbüxen so bi Klock half dree in de Speelhall
kamen un wullen vun de Besökers Bargeld hebben. As se dat nich kregen
hebbt, sünd se mit twee Mobiltelefone vun de Gäst afhaut. De Deder
sünd wohrschienlich mit en sülvern Pkw wegföhrt. De Lüüd hebbt se so
beschreven:
Deder 1: En Kerl, so bi 1,70 bet 1,75 Meter groot, en beten dick,
25 bet 30 Johr olt, Kledaasch: swatte Joggingbüx, swatten Pullover ut
Wull, he harr Hanschen an.
Deder 2: En Kerl, so bi 1,85 Meter groot, 30 bet 35 Johr olt,
dörchtrainiert, Kledaasch: swatte Joggingbüx, swatten Pullover ut
Wull, he harr Hanschen an.
Mellen an de Polizei in Uelzen ünner Tel. 0581-930-0
Bad Bämsen - Füer dörch een Herdplatt
De Füerwehr müss an´n Namiddag vun´n 31.3. to´n Löschinsatz
utrücken in en Huus in de Robert-Koch-Straat. Een hitte Herdplatt
harr gegen Klock fief dorför sorgt, dat en poor Saken op den Herd
in´t Brennen kemen. Dat Füer künn fix löscht warrn un de Schaden an
dat Huus holt sik bi 2000 Euro.
Uelzen - ünner Drogen Auto föhrt
Den Fahrer vun´n BMW-Auto hett de Polizei in de Middagsstünnen in
de Fischerhofstraat anholen. Bi de Kuntrull Klock 12 hebbt se bi den
21 Johr olen Fahrer faststellt, dat he ünner Drogen stünn. De
THC-Test bi´t Waterlaten füll positiv ut.
Übersetzung: Günther Wagener, Plattdeutschbeauftragter für die
Hansestadt und den Landkreis Lüneburg
Rückfragen bitte an:
Polizeiinspektion Lüneburg
Pressestelle
Kai Richter
Telefon: 04131/8306-2324 o. Mobil 01520 9348855
E-Mail: kai.richter(at)polizei.niedersachsen.de
http://www.polizei.niedersachsen.de/dst/pdlg/lueneburg/
Themen in diesem Fachartikel:
Unternehmensinformation / Kurzprofil:
Datum: 01.04.2016 - 11:15 Uhr
Sprache: Deutsch
News-ID 1428446
Anzahl Zeichen: 0
Kontakt-Informationen:
Ansprechpartner: POL-LG
Stadt:
Lüneburg
Kategorie:
Polizeimeldungen
Dieser Fachartikel wurde bisher 0 mal aufgerufen.
Der Fachartikel mit dem Titel:
" ++ Kerls mit Masken in de Speelhall - statts Geld mit Handysöver´n Diek gahn ++ Radfohrer dull mallört - nich op´n Verkehr acht ++ Haueree in de Binnenstadt ++"
steht unter der journalistisch-redaktionellen Verantwortung von
Polizeiinspektion L (Nachricht senden)
Beachten Sie bitte die weiteren Informationen zum Haftungsauschluß (gemäß TMG - TeleMedianGesetz) und dem Datenschutz (gemäß der DSGVO).